廣告經綸:名牌CV不代表一切 - 文廸晞

蘋果日報 2015/06/25 00:00


又到暑假,呢段時間,通常都係後生仔女爭入大藍籌公司做intern嘅時候。可以進入大藍籌實習,當然唔少係老闆親朋戚友啲仔女。唔知點解,佢哋有個共通點,除咗英文好native,好多都在外國名校讀書,連份intern工都係廿四孝父母悉心安排,美其名入公司攞經驗,其實係想整靚份CV,未畢業已贏在起跑線。呢班小朋友自小讀慣名校,通常中學已被保送到外國讀書,入讀如Oundle之類嘅名牌boarding school,一年學費至少50萬,然後直入Ivy League大學或牛津劍橋,唔憂柴唔憂米。
可能潮流興講創意,近來連國際大廣告公司都獲呢班父母垂青,勢要安插仔女嚟做intern,不少來自Stanford、Oxford、UC Berkeley等名校,份CV拍得住港姐Louisa Mak份「無得輸」履歷。
我想講,並非佢哋份CV有幾靚,而係佢哋離開象牙塔後,有時表現真係好離地。佢哋雖然人在香港,身上卻永遠唔會有八達通,當然,佢哋喺外國從來唔搭地鐵,在香港去邊都有司機,無需要八達通係好正常,所以更加唔會知7-11有增值服務,同有燒賣和魚蛋賣。
有次同事帶個intern去上海搞活動,一心畀佢見識吓。公司規矩,低級員工只准坐經濟艙,這是常識吧!點知去到機場,佢才晴天霹靂發現如此安排,自然好委屈,但班機已經full咗,想upgrade都無法,佢索性另買張Business Class機票等下一班才飛。本來佢嘅級數係跟大隊住Westin,佢就畀錢跟高層住Ritz-Carlton,之後好認真咁解釋,佢唔想離群,只係唔習慣瞓其他酒店嘅床,佢屋企張床都係專誠託人搵Ritz-Carlton訂製,唔貴,只係三萬蚊。我好相信,如果佢唔係老闆個老婆個家姐個女,我已經抦咗佢。當然唔係每個intern都咁離地,我亦認識唔少intern,一人分演度橋寫稿剪片幾個角色而樣樣皆能,仲要通頂後,第二日食住個包繼續返公司搏殺,一句怨言都無,當中唔少係本地大學出品。所以話睇人唔好咁表面,係要睇實力同個心。

文廸晞
mailto:[email protected]