周日阿根廷盃64強賽事，第6級別球隊帕西菲科爆大冷，作客阿甲球隊學生隊，以3:2贏波晉級。不過賽後仲有故講，帕西菲科嘅後衛艾蘭迪（Federico Allende）懶得戚，自爆話佢喺比賽期間不斷用針拮對手前鋒祖安奧迪路。

艾蘭迪日前接受阿根廷電台訪問話：「佢（奧迪路）一定憎死我，但足球比賽就係咁，唔可以對對手仁慈，對住學生隊呢種級數嘅對手，乜嘢污糟手段都要用。」受害者奧迪路喺賽後亦有講呢件事，話比賽期間不斷被拮，向球證投訴但冇受理。