一次又係佢，第二次又係佢。模媽Mia陳靜儀似乎好受應召網「歡迎」，之前有微信，今次有台灣LINE。今日台灣《壹週刊》爆料指Mia同《怪談》主持黃紫桐、曾拍《喜愛夜蒲3》嘅何沅瞳（Sandra）等捲入台灣應召網賣淫案，眾女更加有圖有名有齊資料擺晒上網供人挑選。

上次Mia已透過經理人否認涉微信賣淫案，表示自己依家忙於喺大馬同內地做商演、打碟同唱歌，又笑謂:「多謝佢哋關照，叫佢哋專心做好自己啲嘢先啦。」

今次Mia親自接受《蘋果》電話訪問，否認涉此事。記者提到佢捲入台灣「淫LINE」事件，Mia即自動波謂:「講我五萬蚊呀嘛(報道指Mia應召價為個半鐘五萬新台幣)，好無謂，唔想回應。啲人覺得做0靚模，要賺錢養家就要咁做。」

Mia表示佢都係經理人公司話佢知，先至知道自己又捲入是非當中。Mia連聲謂:「其實我除咗喺娛樂圈發展人，仲有學金融投資，單係上落都唔止呢個數(五萬)啦!我使唔使咁做呀？」

Mia強調，依家忙於喺內地同大馬接騷，打碟唱歌，「每次收入都係呢個數嘅幾倍啦，啲人戴有色眼鏡睇0靚模。」講到話近月來兩度「榜上有名」，Mia話:「就係啲人戴有色眼鏡，見我有小朋友，要照顧佢哋，所以就覺得要做呢啲嘢。其實依家好多女性有獨立能力0架。」

至於是否曾遭人問價？Mia承認:「喺fb同微信都有奇怪人問奇怪嘢，不過我都係唔會答。(有冇人托經理人問你價？)唔知喎，可能佢幫我擋晒啩。總之肯定冇人透過身邊人問過我。」