【新增影片】
原來今個星期五就係元宵佳節，民主派新東補選候選人范國威（Gary）同港島區補選候選人區諾軒，將會同埋公民黨陳淑莊、人民力量快慢必，即係譚得志同陳志全，喺銅鑼灣百德新街開Show贈興。Gary畫畫了得係人都知，估唔到佢仲係唱得之人，據知當晚佢會唱情歌，應節地冧爆市民。

睇返張宣傳海報，Gary同陳淑莊都用咗張留鬚嘅相，Gary笑稱嗰晚將會係「五條佬」開show。佢透露上次年宵唱過歌，反應良好，今次食過翻尋味，再接再厲再開腔，但唔會淨係翻兜交行貨，屆時會唱上次年宵未唱嘅「More than I can say」，包有新鮮感喎！唔知佢嘅歌喉，會唔會為佢吸到更多票呢？

新界東立法會補選候選人包括范國威，身兼工聯會民建聯的鄧家彪、區議員方國珊、黃成智、趙佩玉及陳玉娥。

立會補選新聞，《蘋果》一網睇晒
https://hk.feature.appledaily.com/legco2018/