陳自瑤（YoYo）同王浩信屢次傳出婚變，最近又再傳兩人離婚，今日陳自瑤到馬鞍山出席活動，手上未見婚戒。

睇番兩人ig，YoYo同王浩信都極少家庭照，YoYo更連連發出充滿正能嘅post，包括上月30日呢句：「圓規為甚麼可以畫圓？因為腳在走，心不變。你為甚麼不能圓夢？因為心不定，腳不動。奇蹟，還有個名字叫努力！」結果惹人疑竇，係咪有所暗示？記者今日問到YoYo老公係咪圓規隻腳？佢澄清冇咁嘅意思：「其實一直寫嘅係文章分享，如果針對文章嚟幻想另一啲嘢，copy前copy後嚟講，係斷章取義，我冇咁嘅意思。」

講到兩人除咗同囡囡嘅親子照，會唔會考慮放多啲夫妻合照放閃？YoYo就解釋話要忙住拍劇：「其實我哋不嬲都少post嘅，加上呢排我又要拍劇啦。」至於王浩信喺ig嘅父女相，記者問係咪YoYo揸機影？佢就答：「maybe，maybe，maybe，有時小朋友佢都唔係正面，都係小小，佢想post個感覺，咁又唔係下下一家三口，我都冇post一家三口，都好少post小朋友。」佢又舉例，自己唔貼親子相，唔代表母女關係差，有啲事自己明白就可以。

精選娛聞，喺晒《娛果》
http://fb.com/appledailyent