香港電影市道近年雖然有番啲起色，但同荷李活大製作排埋一齊，票房始終爭一截。仲有一個月就到農曆新年黃金檔期，香港戲院商會副理事長鮑文範話今年有星爺嘅《長江七號》同周杰倫嘅《功夫灌籃》雙周壓陣，票房應該可以贏番西片一仗，佢同八方講自己雖然未睇過《長江七號》，但星爺一出，通常冇咩走雞，話唔定仲可以跑贏埋佢之前嘅舊作㖭。
八方梗係希望港產片生生性性，但市民要睇好戲，政府都要出吓力；財政司司長轄下嘅經濟分析及方便營商處早前引入臨時牌照制度，戲院商申領營業牌照時間縮短至兩個月就搞掂。鮑文範話，多項措施之下，已經有六間新戲院受惠，今年會再開多三間，八方當然希望戲院越開越多，就邊度都有好戲睇。