美股大跌，有博士級人馬就話，「邊關油價事，係因為美國通過《香港人權法》！」中間個邏輯，的確唔係我等凡夫俗子看得透。如果硬要為「美國跌市」搵始作俑者，我以下呢個說法，相信比較講得通：

要不是中國隱瞞疫情，疫情就唔會擴散到全中國，繼而全世界；
如果疫情冇擴散，就唔會全球需求大跌，令原油供過於求；
如果唔係原油需求大減，沙地就唔會要求減產，咁就唔會令佢同俄羅斯反枱；
如果佢哋冇反枱，就唔會逼到沙地玩攬炒，推冧個油價；
結論就係，要不是中國隱瞞疫情，蝴蝶效應下，全球埋單，油價單日大跌三成，美股插到熔斷。

講起來，香港人講「我要攬炒」講足九個月，但真係要攬炒成功，香港人始終都係業餘，輸俾隻蝙蝠。

蝴蝶效應延伸落去會係點，結局未知，但考古睇歷史，你會發現石油價格戰，最終可以好大鑊。

大家要知道，面對俄羅斯唔肯減產，沙地玩緊個遊戲係，「你大我呀？我就同你玩大佢！我自己推冧個價，睇你捱得幾耐？我就唔驚呀，我原油成本每桶先係10蚊美金，全球最平！」

當然俄羅斯作為戰鬥民族，就大返佢轉頭，「我就預咗同你玩大佢嘅！就算油價跌到25蚊，我都頂到6年呀！」

呢種鬥大嘅玩法，就似1986年嘅石油戰爭。70年代至80年代初，油價係咁升。雖然1981年開始，原油需求下跌，但係各產油國為搶市場，係咁增產，結果至到1986年就爆出供過於求危機。

咁沙地作為最大產油國，當時不斷呼籲OPEC減產，甚至以身作則，自己主動減產，結果當然係，其他人表示「睬你都傻」。沙地話就話係大佬，但緊要關頭，冇人齊上齊落之餘，自己市場仲俾人食埋。終於，沙地發火，非同小可，嬲起上來就決定「我要攬炒！」1986年放棄「減產保價」政策，開行機器去產油；與此同時，美國拋售石油戰略儲備，結果令油價由35美元，一打就打到10蚊美金，油價亦展開為時十幾年嘅熊市。

因為一次反面，令國際形勢洗牌：油價下跌，大大刺激美國、日本製造業；令沙地、科威特等阿拉伯產油國近乎破產；之後衍生嘅債務問題以至石油糾紛，導致伊拉克入侵科威特、衍生波斯灣戰爭；至於蘇聯呢？油價大跌，成為瓦解蘇聯嘅最後一根稻草。

過往油價大跌，消費國會受惠。不過，事實係「油～不是80年代～」，目前，最大石油進口國係中國，油價大跌三成，雖然理論上會受惠；不過若然世界疫情沒完沒了，國際需求一日未升，作為世界工廠嘅中國，又點可以置身事外？

咁有邊個可以置身事外？有！就係香港嘅油公司啦！油價點跌都好，香港入油都唔會平好多呢。佢哋一定會有原因：「個油桶貴咗……入油支槍貴咗……口罩貴咗……因為香港關係法所以……總知就成本貴咗啦！」

by千頌C@堆填區
http://fb.com/winbigwok/
-----------------------------
【武漢肺炎】專頁
全民自救 抗疫資訊盡在《蘋果》
-----------------------
屬於香港人的移民攻略
立即登入【全球樓行】