越來越多富二、三代浮面。星島集團(1105)噚日宣佈，主席何柱國33歲嘅兒子何正德(Kent)即日起由非執董轉做執董，主要負責拓展數碼媒體業務。

星島舊年已經話計劃發展互聯網同流動媒體業務，前行政總裁盧永雄10月起只做執董，以個人名義跟星島成立合資公司發展呢項新業務。何正德轉做執董兼負責數碼媒體，似乎係跟盧永雄合作喎。

何正德最為人所熟識，就係佢同「娛樂大亨」林建岳位靚千金林恬兒(Emily)拍拖，最近仲有傳聞指二人已經喺外地註冊結婚。