陳庭欣（Toby）今日喺觀塘為活動擔任司儀，轉眼間2010年度港姐冠軍已經闖出一番事業，拍劇、拍電影、司儀工作不乏，提到出爐港姐冠軍雷莊𠒇遭公眾劣評，Toby就話要開電影，工作太忙冇睇選美，連賽制都唔清楚，要睇番先可作個人評論。不過冠軍被大眾品評，身為師姐嘅Toby就勉勵對方：「參選嘅女仔都經過一系列訓練，有各自減壓方法，鼓勵佢有時間多瞓覺，唔好諗太多無聊事，要對自己有信心，我當選後都有段日子好難有得瞓覺，好多活動要出席，我會同佢講目前要瞓覺食嘢最緊要。」

另外，Toby被爆與「有米大狀」唐偉倫（Warren）拍拖，日前更相約去半島酒店食飯慶祝生日（新聞連結： http://bit.ly/2ex80q9 ），不過Toby矢口否認戀情，佢話：「唔想一講咗就將關注點放咗落去，想保持低調，我嘅性格對屋企人都一樣，拍咗好耐先會講，好驚屋企人成日問我呢個問題，好怕回答。」

早前Toby經常喺網上曬三點式泳衣照，晒弗爆身材（新聞連結： http://bit.ly/2wzyfUJ ），佢話：「我好鍾意食零食，為咗可以食更多零食減肥，嚟緊有新任務會演保鑣角色，更加要操弗敏捷，自己未做呢類角色，驚整傷，keep住一星期操兩至三次。」