【本報訊】中央一聲令下，自由黨前日火速「縮沙」，連早已在新界西和九龍西派出近10萬份個人宣傳單張的田北辰，亦以五區公投涉及「起義」為由，提早鳴金收兵。田北辰昨日談到自由黨縮沙過程時，坦言來得十分突然，又聲稱黨內民意調查一直顯示他勝算甚高。對於突然不能出選，田北辰坦言：「老老實實講，一定會有啲、一定會有啲（心噏）」。
田北辰及後暗寸至今未明確表態杯葛參選的其他保皇派政黨，指有人對杯葛參選只懂「齋講」而無行動，不似自由黨般肯作出重大犧牲，又指黨派考慮是否參選，不應該視乎參選人勝算高低，「有啲人可能齋講，話呢樣唔啱，話嗰樣唔啱，但又繼續去選，我哋（自由黨）唔係咁，呢個係幾大犧牲o架。」

工聯會：無勝算唔參選

與田北辰出席同一場合的工聯會會長鄭耀棠，在前立法會議員陳婉嫻表明不參選後表示，工聯會要待公民黨及社民連五名議員遞交辭職信後，才決定是否參與補選，並繼續以參選人的勝算高低，作為是否派人出選的最大考慮，「參選就一定要攞議席，無勝算唔會參選」，又指政府「要諗掂」有足夠經費進行補選。
陳婉嫻較早前表示，她很享受目前工作，無意參選立法會。她認為，工聯會只是勞工團體，並非政黨，現階段看不到討論參加補選問題的逼切性，該會針對五區辭職後補選的討論亦不多。