商台DJ芝See菇Bi（卓韻芝）上星期二喺九龍城屋企用紅酒送服18粒安眠藥企圖自殺，幸好及時獲救，後來曾經一度有傳阿芝係為情所困先做儍事，其中佢同舊男友陳輝陽嘅一段情再被提起。陳輝陽噚日就喺電台節目《最佳配樂》中，首度開腔回應有關佢同阿芝嘅感情。
DJ少爺占前日爆話阿芝大概喺兩周後復工，陳輝陽雖然冇提及阿芝𠵱家嘅情況，但佢就話要特別澄清，因為一直有傳當年佢係為咗阿芝而「拋妻棄子」，同老婆離婚，但最終同阿芝都未能開花結果，陳輝陽話其實佢未結過婚，亦都冇小朋友。講到會唔會同阿芝復合，陳輝陽就好正經咁話：「我可以話畀你聽，卓韻芝係我人生中最好嘅朋友，過去、現在同將來都係。」

彭浩翔寫信鼓勵

此外，導演彭浩翔噚日喺本報嘅名采專欄寫下「給芝See菇Bi的信」，內容提到「生命不如意事恍如潮汐漲退，凡事應向好處想。」原來阿芝同彭浩翔自去年已開始合作寫一部名為《出埃及記》嘅劇本，彭浩翔仲話對阿芝自殺嘅事唔會「takeitserious」，佢只會當呢個係拖延交劇本嘅藉口，至於劇本就一定要交喎。