林超榮、邵音音、雪梨、韓君婷今日喺深水埗出席一個電影頒獎禮活動，電影製作人林超榮在活動開始時召集嘉賓演員上台，向昨晚離世導演林嶺東進行哀悼。

林超榮話：「噚晚一位好出色導演林嶺東過身，覺得好黯然，而且非常年輕，佢對香港電影貢獻好大，係新浪潮導演呢一輩第一個離開我哋，喺80至90年代佢係貢獻最多其中一位，作品包括《風雲》系列，以此作出悼念默哀。」

接住邵音音話：「噚晚聽到消息好突然，覺得佢後生至今都好健壯，動作仲勁過武師男演員，平時好鍾意拎住支筆諗嘢，係一個好老公、好朋友，知道噚日情況係首先太太去拍醒老公冇反應，點諗到過新年發生咁嘅事，對屋企人係好大噩耗，好方面諗就係走時冇痛苦。」並稱讚林嶺東係好人、才子、好丈夫、好朋友、有才華，聽到消息之後音音姐話噚晚喊咗一晚，眼泛紅筋難以接受。

之後音音姐受訪時透露林嶺東是她師弟，大家一齊跟秦燕老師學唱歌，相識幾十年，音音姐話：「印像中佢係一個好靜，好鍾意聽好多嘢，做research嘅人，好踏實用功，認真專一，每件事都做到最好，雖然本身冇同佢合作，有時食煙打邊爐會圍埋一齊，噚晚知道消息即刻覺得係咪真㗎？做朋友接受唔到，屋企人更傷心驚訝，希望佢太太同家人勇敢生存落去，佢係對電影界一個代表，唔捨得一個人才咁後生就走咗，希望家人都以佢奮鬥精神努力生活下去。」

韓君婷今日參與活動擔任頒獎嘉賓，佢透露稍後會為網台做一個主持節目，自己已經十年冇做主持，都驚唔慣要自己執生，同埋考慮點樣能夠吸引觀眾，未開始已經好緊張。韓君婷早前因為媽媽生病後辭去醫學美容職業，媽媽現已過身，她亦調整好心情，再次投身娛樂圈，佢話：「對我嚟講拍廣告拍電影都有難度，因為360度拍攝未必影得我每個鏡頭都靚，希望專注做主持工作，覺得呢個範疇都適合我，我比較多嘢講，試過講到攝影師都話要換帶，唔好浪費自己口才，將我一啲小八卦同大家分享。」