身為「宅男女神」嘅周秀娜為咗電影《分手100次》可以話搏到盡，喺戲裏面同鄭伊健大玩鴛鴦泡泡浴，不過鏡頭後真係有苦自己知，喺天寒地凍浸住凍水，差啲凍到冇知覺，但係佢哋兩個唔單止冇怨言，等埋位嗰陣仲着住浴袍互窒講笑當取暖，伊健笑笑口話：「呢部戲應該叫做《沖涼100次》，我從影以嚟未試過同一部戲拍咁多沖涼場面，今次我終於唔使一個人沖涼，同娜姐鴛鴦泡泡浴！」伊健仲話唔使同老婆蒙嘉慧備案，有鄭丹瑞監場保護娜姐，冇人夠膽諗錯隔籬！

滾水淥腳死頂

喺另一場戲講娜姐離家出走搬咗去酒店，伊健趁娜姐沖涼嗰陣，衝咗入去浴室從後攬住求和，不過娜姐嘅大髀認真受罪，原來為咗營造浪漫感覺，娜姐叫工作人員開熱水，點知佢竟然死忍滾水淥腳，直到導演叫cut機，大家先發現佢對腳變咗做「紅燒豬髀」，睇見娜姐死撐話繼續拍，伊健講反話：「拍埋先啦，一次過，一鑊熟！」娜姐無奈自嘲：「其實係我死蠢！諗住開到最熱就會整到好多水蒸氣出嚟，但冇諗過唔成功！」此外，娜姐前日亦去咗廣州出席試影，之後再去地王廣場出席宣傳活動，娜姐仲做埋愛情顧問幫啲粉絲將「分手遺物」擺入「分手迷你倉」！
撰文：馮仁昭