「不可一，不可再」是政府於10年前宣傳禁毒的口號，年僅30歲的阿雪（化名）吸毒18年，因毒癮導致半身癱瘓及販毒被捕，說起以前不相信這句洗腦口號，「咁後生行唔到要用尿片，我好驚咁就一世」。她中風入院後，起初抗拒戒毒，直至接觸青協推行的全港首個跨界別合作轉介吸毒及販毒青年機制，逐步走出毒癮的圈子，「我今日接受訪問，係想以自己經歷叫身邊人戒毒」。

記者 梁佩珊

香港青年協會「青年違法防治中心」去年6月建立全港首個由8間醫院、警方、海關、社署、律師、學校等跨界別合作機制，各界發現10歲到35歲隱蔽吸毒及販毒青年，便會轉介至戒毒服務機構，至今已接觸24名曾販毒的青年，最年輕的販賣者只有14歲；此計劃亦接觸79名吸毒青年，最年輕的吸毒者只有10歲，吸毒年期最長的是18年，即是阿雪。

阿雪17歲開始吸毒，28歲時販毒被捕，被判入喜靈洲戒毒所前後一年，但從未成功戒毒，家人亦在那年才知悉她有毒癮，「當初入去坐，諗住無乜大不了，當去旅行」身邊亦起碼有30名朋友長期吸毒，當中九成人有黑社會背景，「朋輩的確影響好大，當初係覺得吸完毒，幾日幾夜係咁玩唔使瞓，好正嘅感覺，就停唔到了」。

兩個月前，她因吸毒中風，「一個月前我係行唔到，講完嘢即刻忘記，記性好差，唔想以後無咗人生」，當初青協接觸阿雪時，她亦拒絕，「我諗住醫病，唔係戒毒」，後來半推半就下接受戒毒，「因為30歲，身體已經搞成咁，我亦開始好驚見唔到屋企人最後一面，撞過板先識驚」。

「以前我問阿爸攞錢買冰唔覺得貴，依家我問阿爸攞錢買尿片覺得好貴」，阿雪來自單親家庭，爸爸領取綜援，「尿片好貴，識諗後，我唔想佢咁使錢，我於是係都要自己上廁所」，一個月前，她已迅速逐步康復，但擔心毒害後遺症令她無法再繼續做中廚，「係我興趣，但依家隻手已唔太得」。她希望以自身經歷，令身邊朋友及年輕人戒毒，「我怕現階段把持唔住，我想自己都穩定咗先」。

青年違法防治中心督導主任陳文浩表示，醫院及政府部門介入可及早支援隱蔽吸毒者，不同部門快速跟進，「例如做得到未判刑，警方已通知我哋有吸毒者」。此計劃會維持兩年半，青協亦與港大合作，開發首個綜合需要及犯罪風險評估工具及編製簡短認知行為治療手冊，以便更有系統的介入。