韋達假假哋都係13屆冠軍騎師，呢晚停賽期滿復出，唔甘心早段連場跑位置冇馬贏，卒之輸到第七場畀佢扭轉乾坤。呢場三班1000米，韋達騎次熱門「喜益善」留放恰度好處，最終後上衝贏一對放頭新勝馬「四喜滿堂」同「你知我心」，取得個人復出後第一W，反觀後兩駒同樣冧莊失手，分別跑二、三名。
「喜益善」上次加程跑1200米，表現明顯唔及之前兩場上名咁好，今鋪打王牌跑番強項谷草1000米，韋達之前騎過一次，即喺同班同程建功，結果今次人馬重逢又贏，保持合作全勝，真正人夾馬緣，至於沈集成連同第二場贏次熱門「大勇士」在內，整晚憑一對王牌馬起孖。