立法會一復會就流會，大家不妨買定幾箱花生慢慢剝，皆因未來4年肯定有排睇戲。好似噚日，議會新丁熱血公民鄭松泰就同民建聯蔣麗芸擔綱上演大龍鳳，喺點人數期間，泰博將建制派枱上嘅國旗同區旗倒轉，元秋使出獅吼功，大鬧對方賤格同偷嘢，泰博唔理再整多鑊，結果俾主席梁君彥逐出會議廳，但咁啱嗰時流咗會，連議會被逐第一次都有啲蝦碌。
為咗顯示對北京嘅忠誠，大部份建制派噚日都將一支國旗同一支區旗放喺枱面，向「辱華」說不。喺點人數嘅15分鐘響鐘期間，泰博突然走去已經離場嘅建制派嘅位置，原來係逐一將呢啲國旗同區旗倒轉放。

「賤格！盜竊！」

點知已walk out嘅元秋發現咗，即時歸位，大叫：「鄭松泰，你搞咩呀！你將國旗倒轉咗！」佢即時叫立法會職員同佢一齊將國旗區旗還原，仲大嗌泰博「賤格」，但泰博就話建制派表裏不一，口講愛國，卻手持別國護照，「坐喺上面（主席梁君彥）都係英國人」。
嬲豬元秋更走至泰博個位到話：「你玩還玩，唔好攞國家嘅嘢嚟玩，唔好搞國家啲嘢，你唔好搞我哋啲嘢，我唔見咗錢，唯你是問！唔好掂我哋枱面嘅嘢！」泰博等元秋走咗之後，又再整多鑊，今次俾梁君彥警告多次，但泰博一於少理，仲揶揄梁君彥係外國人：「落番嚟啦，英國人！」
梁君彥最後宣佈驅逐泰博，元秋呢個時候又返嚟，走埋去泰博度大鬧：「你企圖盜竊，出去！」搞咗一輪，立法會保安搞唔掂死都唔肯走嘅泰博，但由於傳召鐘聲已夠鐘，流會成定局，泰博嘅被逐第一次，坐喺議席唔使走。

李八方
mailto:[email protected]