湯臣（258）喺內房企業當中，係超級現金牛，金融海嘯底下係大贏家，昅昅好。湯臣08年半年度（6月底止），收入減咗8800萬銀到1.64億銀，但純利大升兩倍到4.89億銀。純利好大部份係投資物業重估增值收益，相信全年度都係咁，透過非現金性收益，去支持增長。
但要咁睇，湯臣去年6月底，手頭現金16.14億銀，同期負債得3.87億銀咁大把，揸住淨現金12.27億銀，每股淨現金高達0.93元，係現價（1.40元）66%。內房企業當中，湯臣係超級現金牛，經歷呢段環球金融海嘯，湯臣守又得，趁機撈底執平貨，去迎接祖國下一次樓市大升浪又得，實情係大贏家。又湯臣同期NAV5.93元，現價折讓高達76%，炒NAV折讓，一啲唔輸蝕。呢轉買湯臣，博集團NAV折讓，係咁意收窄到65%，湯臣已經要見2字頭，現價潛在回報率講緊係43%。

彩虹電子冷灶精選

彩虹電子（438）插到近上市以嚟低位，殘到唔殘，又係冷灶精選。呢期資金熱炒低殘工業股，彩虹價殘唔在講，現價（0.33元）相對NAV1.32元，折讓高達75%，已經有得炒折讓。
又彩虹呢期主力發展節能用三基色螢光粉項目。要咁睇，家吓除咗祖國大力推動環保，連花旗候任主人奧巴馬，話一上台都要推動呢項節能措施，彩虹應該可以靠呢瓣食糊。冷敲彩虹，博上返上年9月橫行位0.40元，回報率21%，有魚有肉。
錢雋