李八方online︱「香港加油」變禁語 譚文豪誤揭民政署「用心良苦」
蘋果日報 2020/12/24 19:22
李八方online譚文豪
今年2月政府派1萬蚊嗰陣，林鄭話係幫市民「加油」。資料圖片
民政署唔批油尖旺區議會用「香港加油」做節日燈飾，相信唔少市民一肚氣，公民黨副主席譚文豪就喺Facebook鬧爆民政署，仲回帶講返特首林鄭月娥亦講過「加油」。真係一言驚醒夢中人，原來大家都怪錯咗民政署，「香港加油」真係不適宜講㗎！
譚文豪話呀，今年2月政府派1萬蚊嗰陣，林鄭話係幫市民「加油」；到咗5月，林鄭又話好多同佢講「加油」嘅市民都叫佢快啲就《基本法》23條立法。本年7月港版國安法生效後，有台式茶飲店憂慮文宣成為禁語，老闆擔心日後連有「香港加油」字句的商品也被禁，果然一語成讖。
大家諗吓，每次聽到林鄭講嘢已經好不安，再聽到佢講以上內容，係咪直頭引起咗啲誤會，甚至令成個人都覺得好唔和諧先？咪就係囉！所以民政署先用呢啲理由禁用「香港加油」，歸根咎柢就係知道林鄭用過呢啲字詞，再用咪會令好多香港人喺節日都唔快樂，於是索性唔畀用。
但咁就大鑊嘞，林鄭成日講咁多嘢，一時話「我做錯甚麼？」一時話「迎難而上」，再加埋成日用嘅「一如以往、不偏不倚、絕不姑息、強烈譴責、細心聆聽」，仲要成日講乜都加個「嗄」，怕且民政署嗰張林鄭錄音機Bingo卡會越嚟越大張噃！
-----------------------------
《蘋果》英文版免費試睇：了解更多
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！