新民黨噚日舉行新春團拜，年初二喺車公廟被麒麟撞倒嘅黨主席葉劉淑儀喺自己主場，零舍自在。佢以一身穿青檸色長褸亮相，唔再着應節唐裝，皆因佢話成個新年着咗中國服咁多日夠晒皮嘞，決定改着西服食西餐。

新民黨四十人戰區選

席間佢仲大派「玫瑰饅頭」做新年小禮物，話以前女人爭取政治平權嘅口號，就係「又要玫瑰，又要麵包」，叫記者估吓邊個地方女性最早有投票權，答案原來係新西蘭。講咁多，無非想話女性喺政壇嘅勢力越嚟越活躍，睇嚟葉劉嘅野心，冇因為俾麒麟撞到粉碎。
但捨中取西嘅葉劉，卻連中共建政年份都搞錯。佢喺團拜後喺facebook貼文，講番團拜上談及婦女平權發展史，話中國喺一九四七年「立國」時已實行平權，但中共明明係喺一九四九年先建政喎，佢咁唔熟國情，阿爺會唔會唔畀佢出閘選特首㗎？
葉劉噚日仲帶埋好多今年出戰區議會嘅現任議員、新丁同大家見面，希望今年約四十黨員出戰區議會選舉。佢話港島區人口老化，加上多為中產，因為雨傘運動而有意參選嘅年輕傘兵，唔會有優勢喎。