當年今日
關於我們

【現感到身心暢快】切走部份胃部組織 洪朝豐避一刀劏肚

蘋果日報 2019/01/02 22:38

洪朝豐復發舌癌

曾患舌癌的洪朝豐,雖然曾做過切脷手術及接受電療治療,不過去年10月卻指自己疑似癌病復發,當時他表示發現自己右頸某處突然腫了一塊,更話:「之前右邊淋巴有癌細胞,現在左邊淋巴腫腫哋。」(新聞連結: https://bit.ly/2GOJ8uE )
事隔約3個月,洪朝豐原來在上月31日,已經安排了手術,今晚他在fb出post,表示自己剛做完割除4厘米大的小腸腫瘤微創手術,現正在醫院休養中:「手術後兩天,悄然從2018年,滑入2019年,經歷了兩次大痛楚,疼痛難擋,很辛苦。然而,最辛苦的時間過去了。」
洪朝豐又表示,現在精神不錯:「現在感到身心暢快,精神挺好。感謝大家無微不至的慰問,祈禱,祈福,和關心。」但他透露雖然手術成功,但卻比預期中複雜。「今次是微創手術成功,逃過了開大刀(由胸口向下剖至肚臍眼,很恐怖),但腫瘤比想像中複雜,它在十二指腸生長,黏連胃部,所以,今次也割去了部分胃的組織。也許是因為這樣,疼痛才特別大。而且,要吊鹽水,禁食。又會消瘦了。還未見到手術醫生。也不知道腫瘤是良性抑或惡性。一切交予上天,我全然放鬆,臣服。順其自然。這樣活得自在一些。」
而洪朝豐今晚回覆《蘋果》時透露,自己做完手術後痛了兩日,至今日才減輕,同時亦指自己當日做了約4小時的手術:「今日1月2號,痛楚慢慢減輕咗,我諗痛可能會同今個手術處理腫瘤有關。個腫瘤係喺十二指腸嗰度,連住個胃,唔係淨係切去十二指腸,駁番去咁簡單,要將胃嘅一部份都切走,我估係咁嘅原因比較痛。我係除夕晏晝兩點半入手術室,6點半出嚟,做咗4個鐘頭手術,好好彩個手術係微創。醫生原本做唔到微創,就要開大刀,開大刀就由心口一路向下劏,劏到肚臍,所以今次托賴做微創手術。」
不過洪朝豐話自己手術後未見過醫生:「o依家吊鹽水,因為胃做咗手術,唔可以食嘢,同埋今日其中輕鬆啲嘅其中一個原因,初初手術室出嚟,兩邊手穿住好多嘢,包括一邊係要有一個血壓儀,按時自動幫我量血壓,又駁咗尿喉,另外一邊係鹽水,個鼻聞氧氣,仲有鼻插咗另一條胃喉,醫護人員話驚我胃脹,抽胃液出嚟,等個胃冇咁脹,所以初初幾日幾辛苦,轉唔到身,瞓到肌肉好硬。」
「但係由今日晏晝開始,血壓儀器同氧氣移走咗,自在咗好多,開始可以轉吓身。同埋晏晝醫護人員嚟過整理過床鋪,可以好舒服瞓咗一覺,所以精神比較爽利。不過咳同笑都會痛,無論點樣祝大家新年快樂、身體健康、出入平安,多謝晒每一位朋友關心,我會好好配合治療同休息,出番嚟同大家見面,期待1月12日出席新書發佈分享簽名會,第一次同我嘅讀者見面,諗起都好開心。」
精選娛聞,喺晒《娛果》
http://fb.com/appledailyent