李八方online︱陳肇始記招屢稱「英國病毒」大肆污名別國 卻禁記者叫「武漢肺炎」
陳肇始李八方online武漢肺炎
《蘋果》記者日前喺衞生署記者會上以「武漢肺炎」提問，遭新聞官「提醒」要用中國官方嘅用詞「新冠肺炎」。果然係官字兩個口，食衞局局長陳肇始周一在記者會公佈周二午夜起禁止英國航班抵港，並延長英國抵港人士的檢疫期等新措施時，就多次用「英國病毒」、「英國變種病毒」嚟稱呼有關變種病毒株。點解病毒叫做「英國」就可以隨便講，叫「武漢」卻係所謂「污名化」呢？
新變種病毒其實係有名嘅。英國公共衛生部門（Public Health England）將最新發現嘅病毒株代號定為VUI – 202012/01，代表當局於2020年首個調查嘅變異株。而今日一齊出席記者會嘅政府專家顧問、港大醫學院院長梁卓偉則以「N501Y」學名稱呼變種病毒株。
官場有傳，唔可以用「武漢肺炎」係林鄭月娥嘅命令，甚至話如果記者再以「武漢肺炎」提問，可以驅逐離場；八方聽聞小道消息，傳言係西環宣傳部門，要求林鄭政府跟黨走大外宣主旋律，唔好再「污名化」國家。
-----------------------------
-----------------------------