韓國水木劇（逢周三及周四晚播出）原本一直係李鍾碩同韓孝珠主演嘅《W》做收視冠軍，不過下周三大結局嘅《W》因為劇情越嚟越複雜，一時現實一時漫畫，唔少師奶劇迷都睇唔明，搞到佢哋都寧願轉軚睇啲輕鬆愛情小品，轉捧由孔孝真、趙正錫主演嘅《嫉妒的化身》場。

噚晚《W》播出第14集，劇情講到韓孝珠被真兇侵襲，生命危在旦夕，李鍾碩想到惟一搶救韓孝珠嘅方法，就係將佢寫成漫畫人物，唔知係唔係因為太亂關係，噚晚一集收視跌咗1%，只以10.9%收視，但總算繼續保持收視冠軍。

不過《嫉妒的化身》亦步步進逼，噚晚播出第5集收視再升到9.9%，創劇集開播以來嘅最高收視，同《W》只差1%收視，有望挑戰收視冠軍寶座。至於秀智同金宇彬主演嘅《任意熱戀》收視只得8%，繼續包尾墊底。