劉德華有首歌，叫做《中國人》。劉德華愛國，毫無疑問。

但有啲嘢，要搞清楚。

就係咁嘅，噚日fb上有個維穩page，講咗一件往事。文章指，有次劉德華去日本演出，主辦單位介紹華仔時，將華仔介紹係「香港歌手」，華仔即刻更正：「以後介紹我時，唔好再介紹我係香港歌手，因為我首先係一個中國人！」文章又指，後來華仔仲將主辦方安排嘅日文歌，全部改成國語歌曲。最後仲演唱一首讓每一個中國人都感到自豪嘅《中國人》完場。

該維穩post結論就係：「華仔維護咗中國人嘅自尊，係我哋嘅驕傲同榜樣，值得我哋每一位中國人學習！支持華仔！我係中國人請Like！」

維穩fb乜乜出聲，都有轉貼。另一個用簡體字打名嘅「萍果娛樂」都有出post講呢件事呀。結果，外號「長洲覆核王」嘅郭卓堅信以為真，以為劉德華唔認自己係香港人……

呢篇劉德華話自己係中國人唔係香港人嘅所謂報道，好快已傳遍各大維穩pg同內容農場，即Content farm。

劉德華愛國，係不假嘅事實，但呢篇「唔好再介紹我係香港歌手，因為我首先係一個中國人！」可信性存疑。

fb專頁「求驗傳媒」做過功課，特登搵番呢篇所謂報道源頭——好明顯，大家依家見到各大維穩page講呢單嘢嘅時候，都係冇日期嘅，咁係因為，驚你check到真偽嘛。

「求驗傳媒」搵到嘅「報道」原版。呢個「原版」，精采萬分。

「原版」聲稱，件事係發生於2006年6月5日。呢個「原版」話劉德華去日本開小型歌友會，一開始，劉德華已經拒絕用日文同大家打招呼，又拒絕唱主辦方安排嘅日本歌，就連廣東歌都唔唱，改晒唱國語歌。該「報道」仲「引述」劉德華稱：「本來我是不想來日本的，但是因為合約在身，不得不來日本。」「我想說，音樂是沒有國界的，但是音樂家是有國界的。」並對主辦單位講：「以後介紹我時，不要說我是香港歌手，因為我首先是一個中國人。」然後就唱《中國人》。

但，2006年6月5日，劉德華喺香港。唔通識分身？

咁劉德華有冇講過自己係中國人？有。

2000年11月9日，第五十五屆世界傑出青年頒獎典禮在日本札幌舉行，得獎者之一劉德華專程飛往出席。雖然大會要求各位世界傑青要以西式禮服出席，但華仔堅持穿黑色中國長衫出席，凸顯其中國人身分。97年，劉德華仲作咗首《中國人》，就連上海巿教育委員會都選之為「中學生愛國主義推薦曲目」。

咁華仔認唔認自己係「香港人」呢？認。

06年6月29日，即上述所謂「劉德華去日本與歌迷聚會」事件嘅同一個月。當時劉德華應邀去紅館出席「為中國喝彩 慶祝香港回歸九周年大型綜藝晚會」，又係唱《中國人》，並稱：「這證明香港人一直持有勤奮的觀念，我們都在求進步。雖然現在的香港很繁榮，但是我們還有很多的不足，要不斷努力，一個社會要團結才可以成功。」

愛國，可以愛得光明正大，不應造假欺騙感情。

Share文章之前，最好求證一下，否則分分鐘變成「不誠實使用電腦」！