出沒注意，路上又多個新牌仔。

顏卓靈今日喺Instagram貼咗考到車牌相，佢貼相後留言：「終於！！多謝蔣Sir！！！好在有你呢個月細心又幽默嘅指導，唔係拓海都擔心到拓腮啊（蔣Sir我呢個gag o5ok??）#棍波貨van冇難度。」顏卓靈一次過pass考到棍波貨van，唔怪得要高舉勝利V影相。

顏卓靈一take考到牌，網友都戥佢高興，仲話建議佢可以車男友白只。顏卓靈今日接受《蘋果》訪問，仍難掩成功考牌心情，佢話：「一般考試前，會上多堂先考，我平時淡淡定有錢剩，但臨考前好緊張，好似演唱會等開騷心情，以前等開騷，我會向同事大嗌，抒發緊張情緒出嚟。記得臨考前，我同六、七個考生喺等候室，大家眼神交換心情，我閉目養神，叫我名就出去。考牌時，得我同導師喺車，我唯有按下窗，叫一叫，導師叫我冷靜啲，手腳都好震。」不過開考時，顏卓靈就好淡定應付路面情況。

問到顏卓靈準備車邊個去遊車河？佢話：「我考到牌，好多朋友話要坐我手車，仲話開佢哋部車都想試，但我仲驚，佢哋仲成班朋友話要坐滿架車去遊車河，逐個元朗同深井接送，我或者再補鐘，熟習咗先。」顏卓靈次呢專登揀考棍波貨Van，挑戰高難度，因為佢想到將來要扮呢類角色，佢可以親身上陣，唔使用替身。

精選娛聞，喺晒《娛果》
http://fb.com/appledailyent