環球通脹升溫、息魔威脅，股市亦都越跌越低，令不少股票跌到相當低殘水平，吸引大股東或者主要股東增持股份，從近期SDI可見，不少華資上市企業大股東增持股份「托價」。相反，外資證券商或者基金似乎唔多鍾意候低吸納，近期沽貨者多，吸貨者少，正式係「寧買當頭起」嘅信徒。
除咗股東增持，近期亦見唔少上市公司回購股份，例如受越南金融問題拖累而被拋售嘅陸氏集團（366）就頻頻回購。上市公司幾時先至會回購，基本上無乜準則，但多數都屬於資金過多，同時無乜資本投資及資金壓力，既然銀紙出路唔多，就會喺跌市回購股份，利用股份註銷，變相提高每股盈利。

兩個多月動用達億元

最近十分積極回購股份的一間公司，還包括上市僅8個多月，生產及銷售羽絨服的波司登（3998）。波司登在過去一個星期，4個交易日每日都有進行股份回購，合共斥資逾千萬元回購合共770多萬股，而在再對上一個星期，亦都日日進行回購，合共回購1500多萬股，斥資多達2250萬元。
在6月份僅半個月時間，波司登就用咗3200多萬元回購股份，而翻查紀錄，公司自4月中開始頻頻回購，5月回購更加積極，而近呢兩個半月以來，波司登用於回購的資金粗略計算成億銀。集資所得用作回購都算奇聞，點解唔留番啲錢等全年業績派高啲息？去年以3.28元招股價認購之股東，睇住公司用股東嘅錢喺1.40元狂回購，唔知有乜感想。