日本女星中山美穗剛剛先至傳出同作家兼音樂人老公辻仁成離婚，早已移民法國嘅佢，今日下午從法國飛返日本準備為新劇開工，但心情似乎極差，當佢抵達羽田機場時，被追問會否同辻仁成見面，佢cool到爆咁話：「會。」

但當記者影相時，中山一直黑面，露出極度唔高興嘅表情，後來佢仲撓住雙手，大鬧記者：「可唔可以唔影呀！」

據指中山所屬事務所有派出職員接機，仲只係叫記者守秩序，但係冇阻止記者拍攝，當時亦冇做成任何混亂，但係中山全程態度惡劣，令形象大打折扣。