近年奶黃月餅大行其道，幾乎乜嘢品牌都有出品，「富豪飯堂」福臨門舊年首次公開發售兩款傳統蓮蓉月餅，今年亦都用姐妹店「國福樓」嘅品牌，首次推出迷你奶黃月餅。相對佢哋嘅傳統月餅一盒680元，奶黃月一盒8件只賣350元，仲平過半島酒店嘉麟樓奶黃月每盒485元近三成，中環人同強國人都多個選擇喇。

福臨門老闆「五哥」徐沛鈞嘅千金徐淑華（Janet）負責公關同埋市場推廣工作，噚日出席試食會落力推介。佢解釋，見到福臨門嘅奶黃包多人捧場，認為奶黃月應該一樣有市場。佢又提醒，奶黃月保質期只得兩星期，未必會大量生產，叫大家有買趁早喎，果然係做孖屐亭！
其實Janet曾經喺旅發局做過6年公關，一直有份推廣香港美食，市場綽頭嘢難唔到佢。福臨門繼舊年殺入平民化嘅美食博覽後，下星期四開始，亦會喺九倉（004）旗下海港城搞專櫃，其中一款，包裝得好靚嘅單個裝傳統月餅，盛惠200大元，唔知強國人buy唔buy呢？