馬會賽馬電視節目向來口碑一般，最近越洋賽葉森打吡call錯馬事件，外地現場直播都已打出18號馬「巨鷹拍翼」贏，點知班主持仲發緊夢，不停話17號馬「海旁巿集」贏，笑大人個口，雖然主持重新再錄過條走位片，講番18號馬贏，但如果早啲同馬迷道歉，件事就唔會不斷發酵。

咁都唔止，剛周三尾場「翡翠紅星」終點前內欄墮馬事件，條錄播賽事片竟然將成件事消失咗，只係得番外疊衝上來嘅馬，唔單止馬迷覺得咁樣處理手法離譜，連馬會CEO應家柏都覺得有問題，第一時間拆彈，叫影視部還原「消失的真相」，上載原有版本賽事片。聽聞影視部衰完一鑊又一鑊，係啲下屬過份執行指令，唔識執生，所以負責影視部之最高決策人張之杰，下季會將該部門大執，希望挽回馬會聲譽。

馬會影視部完全冇擔當，試問同CCTV啲新聞報道員有乜分別？只得軀殼而冇靈魂，咁嘅水平、咁嘅製作，做乜要去睇？最慘係連競賽小組都一樣，潘頓放死「文藝學家」，賽後問話照單全收，今日（10日）仲搞場大龍鳳開個記招，叫齊晒記者同攝記，但就冇馬評人，唔通驚馬評人破壞呢場SHOW？

首席受薪董事祁禮謙呢日即場播片解畫，全部賴晒落隻馬度，又話隻馬搶口，連潘頓都留唔住，記者照單全收。有冇搞錯？潘頓又唔係見習生，要留隻馬都留唔住？仲有明明「文藝學家」早段已移入「小島怡情」後面找遮擋，在旁亦有「王者再現」封住，但唔明潘頓就忽然拉唔住走外疊上前？

高明