Viu TV《Good Night Show全民造星》現年27歲學員狗毛(羅啟聰)，係「小背心」許靖韻前男友，兩個2014年合作拍微電影《假真界世》撻着，但拍拖3年多，終於喺舊年分手。

狗毛本身係音樂band友，佢喺《造星》每次出場都幾乎孭住結他自彈自唱，個人表演項目solo流暢，但一到團隊表現時，狗毛就相當自我，完全冇顧及別人感受，經常同隊友唔妥及嘈交，搞到個個都覺得佢搶晒fo。

日前狗毛喺觀塘接受《蘋果》專訪，承認性格自我造成不足之處，發現隊友對佢有意見時難以接受，同埋唔識控制自己，狗毛舉例：「例如我見其他組員互寸，我又加埋把口重複佢哋說話去繼續玩，原來俾人感覺狗毛係咪好鍾意搶鏡？但我嗰刻先知道，其實我係想融入氣氛去玩，有時唔識表達。」發生呢啲事情，狗毛點名多謝Lokman(楊樂文)坦率提醒，佢話：「Lokman私下似我哥哥，感受到哥哥愛，好感動，佢會打俾我，覺得我古怪地方會講我聽。」

狗毛每次比賽後睇番節目有好大感受，佢話：「我原本覺得自己好大愛，但以第三身睇返節目，好多不足位。大家一齊表演，呢個人做乜無啦啦發脾氣，好奇怪，用觀眾角度睇返自己更清楚，我太自我嘅原因，係因為檢討能力低，或者唔懂得顧及人哋點睇我。」

被批評一直搶fo，狗毛都懶得平反：「搶咗就算，我唔係有心，自己提醒自己原來咁樣好核突，要學習控制自己。」至於負評，佢就話：「監製花姐批評我會聽，但網上批評呢，我睇兩句要唞一唞，第一句睇到『癲狗收聲啦！』嘩....真係要唞唞，一次過接受太多負能量個心載唔落，好容易令到自己反艇。」為咗反省改善，狗毛都仍然會繼續睇網民畀佢嘅負評。

節目中狗毛曾經流露感性一面，話希望做好啲俾媽咪睇，原來背後有洋蔥：「玩音樂未必賺到好多錢俾屋企，甚至乎冇錢俾屋企，發覺想請阿媽飲餐茶都唔夠錢。」佢話有次失聲喺商場演出，獲阿媽捧場本來係件開心事，但就令佢自覺愧對媽咪。

「媽咪嚟到，發覺唔係好多觀眾，又見我唱得好辛苦，講咗句好感動說話，話:『其實你唔係咁差，我知你做音樂做得好辛苦，未必可以搵到食，有冇諗過做其他嘢？唔好咁硬頸做死一樣嘢。』可能媽咪想我變通，但當時我又想唔開，覺得媽咪係叫我唔好做，我就裝作冇嘢，叫媽咪唔使擔心，我會搞掂自己生活，接多啲工作。」

狗毛話現時經濟尚可，可以請多媽咪飲一兩餐茶，佢會嘗試做多啲幕後工作，並樂觀咁話：「肯努力喺香港唔會搵唔到食，或者慳少少，希望三十歲俾依家收入好。」雖然狗毛入唔到《造星》10強，但Viu TV搞男團，如果狗毛肯改佢自我性格，分分鐘有機會加入男團受力捧。（相關報道：　 https://bit.ly/2CzSRTG　）

採訪：卓寶花
攝錄、攝影：沈健程

精選娛聞，喺晒《娛果》
http://fb.com/appledailyent