當年今日
關於我們

敏妮Talk:樓市藍燈籠都升 - 溫敏妮

蘋果日報 2007/08/01 00:00


公司隔籬組有個同事準備今年結婚,近期積極搵樓,佢知道敏妮都睇緊樓,所以睇到乜盤都send個e-mail嚟問吓意見,好似之前睇中咗層北角樓咁,正喺度同個業主就價錢拉鋸,就send晒個物業嘅資料畀敏妮,問吓個價可唔可以接受。敏妮又唔係住喺北角,好難畀到意見,惟有請教住喺港島區兼熟悉樓市嘅光頭仔。
噚日個同事打電話嚟,話已經扑鎚買樓,但唔係之前嘅北角樓,而係隔籬鰂魚涌區。敏妮覺得樓市短期內可能會向下微調,幅度唔大,但業主叫價一定冇之前咁硬,所以呢位朋友似乎太過心急喇!

升到將軍澳近尾聲

近排樓市成交向好,樓價應該向上,但前個禮拜,敏妮搵樓搵到入將軍澳,聽個agent講,近排將軍澳樓市開始郁,業主叫價都硬咗好多。將軍澳曾經係樓市重災區,經過幾年經濟復蘇,加上供應量減少,要甩嘅蟹貨都應該甩得七七八八;不過,將軍澳仍然係全港樓市反應最唔敏感嘅區,即係話,樓市升,先升豪宅再到一般住宅,先升市區地鐵沿線大型樓盤,最後先升到入將軍澳、天水圍呢啲災區。
敏妮覺得樓市可能會跌少少,原因唔係收到乜嘢壞消息,只係借股市作參考。每次股市升,首先會係藍籌,好似中移動(941)、長和系咁,跟手到二三線股,然後就到細價股都麻雀亂飛,最後當有藍燈籠之稱嘅電盈(008)都升,個市唔跌都回。
同理,呢個世界唔會有長升不跌嘅市場,當將軍澳樓市都活躍起上嚟,即係升勢已近尾聲;加上近排股市升多過跌,位高勢危,花無百日紅,始終有回嘅一日。股市升大家唔會應聲即刻入市,因為就算賺到都希望將本錢同利潤再滾大啲,所以起碼要賺番咁上吓,股民先會肯攞番部份盈利出嚟使,個樓市先郁。
不過,股市跌,樓市通常都應聲跌,所以敏妮認為想買樓,𠵱家唔使急住,除咗睇定啲層樓嘅質素,仲可以睇定樓市走勢。何況噚日賣地成績差過市場預期,多多少少都會影響到樓市,所以短期想買樓,千祈唔好急!
http://manlitalk.com/blogs/