日前喺西九文化區苗圃公園舉行嘅電音節，其間有4人昏迷送院，結果1人不幸死亡，警方喺現場搜到小量毒品，正追查死因及命危者驗尿結果。

而今晚就輪到美國樂隊OneRepublic喺亞博館舉行演唱會，由於美國天后歌手Ariana Grande今年5月於英國舉行演唱會期間遇上恐襲，釀成22死59人傷嘅慘劇，小天后將於後日（21日）於香港亞洲國際博覽館舉行世界巡迴演唱會，所以OneRepublic今晚呢場亞博騷之前已公佈過一系列嘅保安措施。

不過今日現場所見保安就唔算嚴密，現場亦冇特別見到搜索犬，同時亦冇要求入場觀眾經過搜身先入場，只係有金屬檢測睇吓有冇帶危險物品進場，當就唔可以帶背包入場，入場觀眾亦要佩戴保安檢測手帶。

之前大會公佈嘅守則規矩多多，包括：(1)所有觀眾進場前，須經金屬探測器嘅安檢程序，以及佩戴保安檢測手帶；(2)觀眾入場前，須接受手提袋檢查，觀眾唔可以帶背包；(3)觀眾唔可以帶樽裝或罐裝飲品、長遮、自拍棍、橫額、瑩光棒等等。不過亞博館方面回覆指，今晚演唱會進行前的確有安排爆炸品搜索巡查，在觀眾進場前於有關場地確保安全。