喺2011年參加過香港先生嘅黃建東，近來可能受壓力影響，身形有啲脹，佢話：「自從《PPAP》之後，我一路都好想拍番一條片，可以超越《PPAP》嗰條片嘅成績，但我發覺好難，因為嗰時天時地利人和，有個好好嘅點擊，可能我自己俾自己壓力好大，因為好想突破自己，有少少好似患咗暴食症咁樣，靠借食減壓，好多時深夜收工返到去，其實唔肚餓嘅，可能因為精神壓力之下，就會去開雪櫃，好想擺嘢入口，總之填滿自己個感覺。」

黃建東其實都有積極減磅：「自己最近有打泰拳，但打拳又唔係好瘦到，嚟緊我有個做精神科醫生嘅朋友會開診所，可能我要去探一探佢、傾吓偈。」

仲有10日就同2017講Bye bye，咁黃建東喺2018年有啲咩目標呢？「出年應該會開一個mini concert，因為自己一路都有寫歌，希望出年出到歌，搞笑片嗰度都希望再有啲新idea，因為最近呢幾個月我都冇搞笑片出，因為我諗啲project開始複雜咗，想自己再進一步，唔再係1、2分鐘嘅片。演戲方面，希望多啲導演同監製睇到我《番外篇》會嘗試用吓黃建東，可以有重少少戲份。」

減肥，唔止為自己，更因為要做兄弟，黃建東話：「其實因為開《果欄中的江湖大嫂》黃浩然同林子善都好鼓勵我減肥，特別係子善，因為佢出年舉行婚禮，佢話會請我去飲，同埋可能會請我幫手，佢就話：『你以我個婚禮時間做目標，嗰時就要瘦番，咁我都希望可以以一個全新造型去見觀眾。」

更多娛聞，喺晒《娛果》
http://fb.com/appledailyent