【已辦離婚】齊嬌帶兩女返上海娘家 猷啟機場遇記者即黑面
上海女兒何猷啟齊嬌
何猷啟遺傳爸爸何鴻燊的風流性格,近日成為新聞人物,被爆背妻偷食,戀上21歲港女Alice;而老婆「國產GiGi」齊嬌亦不愁寂寞找大隻猛男陪睇牙醫,可謂各自各精采。
今日最新消息,指猷啟和齊嬌在數月前已辦離婚手續,只因賭王喪事未有公佈。但猷啟為避風頭,今早安排老婆和兩個囡囡,包括2歲Tittania和9個月大的Tylia一齊出埠,甘願在 疫情 下冒險坐飛機,認真博。
今早9點45分,齊嬌與兩個女及兩個工人乘坐「偷食七人車」,由西半山蔚然出發往機場,其間車子駛到小蠔灣車廠掘頭路,最後順利抵達機場。齊嬌打扮清新,穿上白色上衣褲配淺紫闊褲和銀色波鞋,雖然戴住cap帽、黑超和 口罩 ,但全程都禮貌回答記者提問,似乎未有因老公出軌影響心情。
齊嬌最先落車,原來一早已有一名女助手在機場等候,幫手拎行李,但只有兩、三件,似乎走得好趕。但打開車門一刻,行李不慎由車尾箱跌落地下,而兩個工人分別幫手抱住兩位小朋友,大女Tittania一邊戴面罩一邊大哭,狀甚狼狽。問到如今與猷啟感情何如?齊嬌淡然地說:「我哋之後會講。」記者追問是否會開記者會?她說:「到時會講。」她大方透露此行目的地是上海:「去上海探媽咪,其實一早plan好咗。」對於被指約會猛男,齊嬌無奈地說:「朋友,細佬(暱稱)嚟……佢都好無辜。」但提到是否早已知悉猷啟有女朋友,齊嬌卻沉默不語。
齊嬌等人出示有效證件後,成功進入機場範圍,原來猷啟一早在機場內等候,但見到大批傳媒追訪,猷啟即時黑面,並用背脊「得」住記者,有關新戀情等問題,一概不回答,齊嬌代解圍:「畀啲空間我哋。」不過,猷啟一見到兩個女兒便顯出慈父樣,由工人手上抱起細女,手法頗純熟,待齊嬌在櫃位處辦理登機手續。
不過,上海之行原來只有三母女及一名助手,猷啟只在機場閘口送別,見他對女兒十分依依不捨,大女不時回望Daddy講拜拜,猷啟又握住細女小手道別,場面感人。反而,猷啟與齊嬌幾乎零互動,只是上機前,齊嬌負責抱住細女,猷啟一度上前幫手。待4人入閘後,猷啟再被追問是否會開記者會交代?他拋下一句:「冇喎。」然後便與兩個工人一齊坐的士返回西半山豪宅。