永恆亞視早前爆咗單笑料，個point就係，亞視想重拍經典作《我和殭屍有個約會》，但其實《殭屍》系列已經賣咗俾FOX。有網民反應迅速就話，依家迪士尼收購咗FOX，將來馬小玲同況天佑分分鐘會加入Avengers呢……勿認真。

而馮德倫所屬的電影公司FILM MAGIC PICTURES，日前就出咗個關於《英雄本色》版權嘅聲明，針對新亞洲電視開拍《英雄本色》之報道，澄清FILM MAGIC PICTURES永久擁有1967年龍剛導演原版《英雄本色》之所有相關版權；但新亞視CEO吳雨就話，今次重拍嘅係吳宇森版本，仲話俾足錢版權持有人Fortune Star（星空傳媒集團）（新聞連結：　 http://bit.ly/2zCihtd ）。

有業界人士爆料稱，因為吳宇森版本《英雄本色》，都係以龍剛作品為藍本，所以即使開拍前，都要得龍剛方面同意。

好喇，講完一輪，大家應該有少少頭緒，邊個版本歸邊個。而今日，Fortune Star（星空傳媒集團）就發咗聲明，證實亞視所屬公司STAR PLATINUM ENTERPRISES LIMITED，獲授權重拍吳宇森版本《英雄本色》電視版一部。

拿，亞視今次真係乖乖豬，有俾錢，有跟足合約精神，咁，大陸呢？

係呀，之前《蘋果》已報道過，大陸導演丁晟（拍過《警察故事2013》），開拍《英雄本色4》，自稱獲得吳宇森授權，記唔記得？呢，記招上，失驚無神整個扮英殖時代嘅郵筒喺台上，丁晟「寄」一張明信片俾吳宇森，向吳宇森「取經」。又係笑出嚟。

笑？依家人哋部戲準備上映，搵錢喇。部戲叫做《英雄本色2018》，香港人看在眼裡，會不會覺得面頰熱辣辣又有啲痛咁，因為俾大陸導演同演員狠狠摑一巴——香港人集體回憶？咩嚟0架？

咁呢部《英雄本色2018》有冇買重拍版權呢？Fortune Star今日份聲明未有提及，據知，丁晟係冇買重拍版權。

正如丁晟開拍前所講，自稱開拍嘅版本係吳宇森《英雄本色》版本，更表示呢個版本係「非常正規、合法和最正宗」（新聞連結: http://bit.ly/2BJ27jy 　）又講明「更接近內地的生活氣息，展現不一樣的電影風格及價值觀、審美等」。

究竟Fortune Star同STAR PLATINUM ENTERPRISES LIMITED會否向丁晟同片商採法律行動，尚是未知，但如果丁生諗住話自己「向吳宇森致敬」，同埋戲名加個「2018」就可以解決法律問題，咁，仲要俾錢買版權做咩？

好喇，呢套大陸版本、自詡「非常正規、合法和最正宗」嘅《英雄本色2018》將於明年1月18日上映，今日喺北京仲舉行盛大記招，咁即管睇下同吳宇森版本有幾次囉——講明先，角色名換晒，Mark哥由《我的少女時代》萬人迷王大陸飾演，超好笑，唔著Mark哥褸，著皮褸。

本來由狄龍飾演嘅宋子豪，就由憑《琅琊榜》上位嘅王凱飾演，改名「周凱」；哥哥張國榮飾嘅警察宋子傑，則由大陸當紅小生馬天宇飾演。就咁睇牌面，冇得輸。

至於劇情似唔似？睇下條預告吖！

相關文章：
【國產Mark哥？】亞視開電視劇《英雄本色》 吳雨：用多啲大陸演員
http://bit.ly/2Bs4bfF

【回憶是屬於真‧港人】連版權都未搞清楚 大陸導演拍《英雄本色4》成疑
http://bit.ly/2BXoYJa

【亞視新CEO：真係好亂】永恆亞視翻拍《殭屍》？Fox發聲明：本公司獨家擁有版權
http://bit.ly/2DydBHK