28歲無綫新晉男神余德丞（Dickson）上個月踢波期間暈倒昏迷，之後喺ICU留醫近一個月時間，Dickson今日復工喇，同蔡思貝一齊喺將軍澳一個商場出席活動。佢哋兩個一齊受訪，佢就話依家身體好好，好精神，比之前只係瘦咗少少，思貝仲話佢靚仔咗。之後佢就講返當日嘅狀況，佢就話：「當時踢踢下波，有啲眼瞓嘅感覺，就出咗場邊休息，瞓咗覺之後就咁，主要原因係心律不正。」佢仲話對當時冇乜印象，知道有啲片可以睇，但覺得好恐怖，所以都冇睇。

Dickson又話入咗醫院之後都冇做咩大手術，只係聽媽媽話昏迷咗三至四日，佢話：「好多人都形容係一個奇蹟，好多謝身邊人嘅支持，雖然醒返嗰時未可以落床，但都認得屋企人同大家，多謝好朋友、同事、全香港市民嘅打氣。」佢又指依家唔使食藥，但都要復診。喺住院期間好多朋友都有探佢，佢話：「都知道好多小學同學、PA、同事、朋友都有嚟探我，但始於係公家醫院，唔想騷擾其他人，所以最後都係親友嚟探我多。」

講到工作安排點，Dickson就話：「拍嘢方便就要睇公司，醫生就叫我呢兩個月唔好做劇烈運動住，可以的話就踏下室內單車，踢波就出年先再踢，呢段時間睇住波先啦。」講到樂小姐話力捧佢，佢就話睇公司安排。

呢件事之後，Dickson都有啲感覺：「學識個人唔好咁心急，要學慢活，同埋要珍惜身邊嘅朋友同埋生命，之前人哋同我講句身體健康覺得冇咩特別，但呢件事之後諗法唔同咗。」

再問到佢哋兩個係咪患難見真情，思貝就話：「我對佢的確係溫柔咗，以前對佢似兄弟吵吵鬧鬧，頭先佢跪低我都叫佢唔好跪咁耐，感情都升溫咗。當時聽到佢入醫院我都好震驚，即刻去醫院，原來我都好珍惜呢個好朋友。」之後Dickson就話：「真係唔好意思，辛苦晒。」頭先思貝嘅爸爸媽媽都有嚟，問到Dickson見過佢哋未？佢就話今次係第一次。

精選娛聞，喺晒《娛果》
http://fb.com/appledailyent