股市淡靜，芬佬同散戶都無心戀戰，分析員寫嘅研究報告都無咁多人搶住睇，但係分析員都要做嘢㗎，想要有人留意自己嘅大作，唯有諗計，整個「震撼價」應該係唔錯嘅選擇。

目標價爆上325元

花旗分析員RaviSarathy噚日就成功借QQ上位。佢最新發表報告，將騰訊（700）目標價升至破天荒325蚊。騰訊亦聽晒話，升咗14.6大蚊，收報244.6蚊，差兩個二，就去返今年5月做到嘅歷史高位246.8蚊。
之但係，相對花旗個目標價，騰訊仲有33%上升空間，對於好多二、三線股來講，一年升三成濕濕碎，但騰訊係隻藍籌股，再升三成似乎太誇張。Sarathy今年已經兩度上調騰訊目標價，家陣連3月時所訂嘅目標295蚊都未到，何解咁鬼牛呢？