打工仔日日花個幾兩個鐘頭搭地鐵，人人有俾錢，無人有優待，無奈總有人行為可恥，令人髮指。

柱男柱女：繁忙時間逼滿人，逼到連前面市民條頭髮吹起都差點碰到個咀，你都仲要整個人挨住，甚至攬住條柱。想要表演鋼管舞，非但換不來掌聲，甚至很多人排隊兜巴星。

企近門口死都唔走：每逢轉車，總有一兩個未到佢落車，又企係門口的人，諗住縮起個膊頭，夾埋雙手，就以為縮細幾個碼，俾人從兩邊出入。乜出咗車廂，唔可以入返架咩！

掂你一下如殺你全家：車廂內誰無壓力？有個阿爺湊住兩個幾歲大孫女，孫女隻腳唔小心撞到隔籬個四眼仔一下，即使架著黑色鏡框，框內殺氣完全爆發，怒睥阿伯，此際擔心「小童搭港鐵踢親老伯被打母哭訴」事件重演，幸好四眼仔電話一響，怒火被帶到冰箱。

該讓不讓的座：不少人心底藏著：「我返咗成日工，我都好累！」但阿公阿婆撐住拐杖，大肚婆鑼咁大個肚揀係你面前，唔係以為抱住「讓俾你係人情，唔讓俾你係道理」的問題，而係個車chok一chok，佢出事嘅後果比你為大。最可恥嘅係，後生世仔掛住篤手遊，扮睇唔到都未夠，明明金精火眼打緊機，一見長者孕婦企近竟然極速熄機扮瞓覺！要講多次：「可恥！」

關愛座成批鬥座：已經晚上十一時許，乘客零星落索，惟獨餘下關愛座位，捱足一日帶著疲倦身驅的阿叔走到關愛座坐下，對面那看似三四十歲的女士突然轉頭睥了阿叔一下。無長者孕婦小朋友，坐陣都唔俾？正義感是要適時發放的吧。

你搭地鐵可能見到更多睇唔過眼的行為，有的行為可以息事寧人，小事化無，但有啲行為令人自覺可恥，就像撐住拐杖的阿婆站著，而你坐著篤電話。身邊乘客唔出聲唔係詐唔知，而是短短車程好快過，但即使選擇沉默，其實心內一直鄙視你！

記者：陳家雄

蘋果財經，關心你飯碗
http://fb.com/appledailyatm