西班牙檢察當局最近好忙碌，頻頻向球星出手，繼早前指控皇家馬德里球星基斯坦奴朗拿度（C朗）同前皇馬主帥摩連奴逃稅後，另一名前皇馬兵迪馬利亞亦被告逃稅。現效巴黎聖日耳門嘅迪馬利亞決定認罪交罰款，盡快解決件事。

英國《太陽報》同《每日鏡報》引述西班牙傳媒稱，「天使」被西班牙政府控告兩項逃稅罪名。案情指，迪馬利亞效力皇馬嘅四年間，兩次逃稅，總金額為114萬鎊。據報道指，迪馬利亞認罪，被判監一年同埋罰款176萬鎊（約1,743萬港元）。因為喺西班牙法例入面，判監兩年以下嘅刑罰係唔使坐監，所以呢位阿根廷球星乖乖交完罰款就應該冇手尾跟，唔使真係入去坐。