用手機上網搵資訊，邊個來源最多人like？嗱，八方先旨聲明，以下報道唔係廣告，而係Google發佈嘅新聞內容。
Google噚日公佈香港今年本地資訊平台手機搜尋排行榜，近年積極發展網上新聞媒體嘅《蘋果日報》「Apple Daily」，擊敗唔少熱門網上討論區如「HK Discuss」等稱冠，而《東方日報》只排第5，《主場新聞》音容宛在排第6。查實「Apple Daily」除咗成為本地資訊平台手機搜尋No.1，仲喺Google香港2014熱門關鍵字手機搜尋榜排第2位，僅次於「iPhone　6」。有此佳績，八方相信《蘋果》同事會繼續努力，喺機不離「搜」嘅時代，提供更多熱爆資訊。

本地議題：佔中排第2

而喺過去一年同政府惡鬥糾纏嘅港視「HKTV」，幾經波折，終於喺上月網上開台，畀廣大電視迷多一個選擇，「HKTV」成為港人茶餘飯後關注嘅話題，順理成章成為Google香港2014最多人搜尋嘅熱門關鍵字，砌低排第2、機迷苦等多年終於有大屏幕嘅「iPhone　6」，連四年一度嘅「世界盃」亦屈居第3位。
有客機下落不明嘅「馬航」，唔知係咪事故頻頻好惹關注，排喺第4位，仲勁過排第8嘅韓星金秀賢。至於無綫「話題」電視劇《使徒行者》，竟然都為大台增光排第5位，唔知網民係想search吓套劇幾咁神、定係幾咁膠？
「HKTV」同時登上Google香港2014本地議題搜尋排行榜首位，被視為香港近年最大規模、影響深遠嘅「佔中」都不敵港視屈居第2位，對魔童王維基嚟講，2014年都算係咁喇。

李八方
mailto:[email protected]