百事可樂為了爭取亞洲市場,近年不斷邀請亞洲區紅星任廣告代言人。現時台灣人氣組合F4、周杰倫和本地歌手郭富城和鄭秀文均是百事音樂家族的亞洲區成員,他們將於三月八日滙聚香港紅磡體育館,演唱一場「百事音樂家族慈善演唱會」,所有收益將撥捐「世代無肝炎基金」購買疫苗。
下月有飛賣
百事發言人Fion昨日接受電話訪問時說:「今次搞呢個演唱會最困難係度晒佢哋四個單位嘅檔期,好似周杰倫為咗呢個演唱會要專登喺美國飛嚟,F4要集齊四位成員嚟香港,度期最辛苦,好彩都度到。
「另外鄭秀文同郭富城已答應演出,我哋重會邀請前百事巨星好似王菲同張國榮參加今次演出,希望呢個慈善音樂會可以有新舊百事巨星參加,下個月八日就開始公開賣飛。」
而百事亦想找英國的代言人碧咸亮相,Fion說:「碧咸要應付咁多球賽,當然冇可能親自嚟香港做嘉賓,但我哋希望可以請到佢喺英國錄啲說話,然後到時喺個演唱會度播出。」
F4提早過年
此外,F4昨日在台灣宣傳,他們在農曆新年將會到美國拉斯維加斯和紐約做巡迴演唱,所以四子昨日提早跟歌迷慶祝新年。
四子在台北、台中和台南連趕三場,台北站的歌迷為見偶像除把會場擠得水洩不通、歡呼聲不絕外,還高舉「最愛旭」和「仔仔」等的紙牌。
問F4可有為新年做準備,他們表示一早準備了給家人過年的利是,談到新年願望,朱孝天說:「先來放假吧。」