【本報訊】政府對低下階層住屋資助的承擔愈縮愈少，在公布停售居屋及公屋後，房屋及規劃地政局局長孫明揚表示，長遠來說連公屋也沒有必要再興建，因為公屋騰空出來的單位可以循環再分配予輪候冊的新增人士。
有社會團體及房委會成員批評其講法「不切實際」和「不負責任」，說到底是為徹底卸下公屋的包袱鋪路。

聽眾指偏幫地產商
孫明揚昨早出席電台節目時表示，長遠來說政府可不用再興建公屋，他說：「我諗或者會有一日，公屋嘅循環作用可足以維持一定數目空出嚟嘅單位，容許每年響外面入嚟嗰啲（居民）住，咁或者我哋唔使再起屋，呢個係比較長遠。」但他強調，在他任內也不會停建公屋。
孫明揚表示，公屋資助並非一生一世，富戶亦需交較高昂的租金，故希望每年至少有一萬個公屋單位騰空出來循環再用，當局稍後亦會推出租金津貼讓輪候冊人士選擇租住私人樓宇。
有聽眾致電到電台批評當局穩定樓巿政策是偏幫地產商：「香港財政赤字咁緊張，你哋（政府）重話攞公帑嚟貼畀啲輪候公屋人士去租住私人樓，呢啲政策就係偏袒地產商。」
房委會租住房屋小組成員兼香港社區組織協會主任何喜華表示，截至今年八月共有八萬七千九百多戶輪候冊家庭等候上樓，近年經濟不景氣，申請入住公屋的巿民一年比一年多，在九九至二○○○年度有近二萬五千個新申請個案，○一至○二年度增至三萬七千多個申請。
何喜華說：「孫明揚話唔再起公屋係不切實際，亦係唔負責任，數都未計掂就亂噏嘢，搞到人心惶惶，好易造成社會不穩，𠵱家冇咗居屋，租金津貼又唔係人人接受，邊可以騰空咁多公屋出嚟畀新嘅需求。」