Twins嘅「Twins LoL 世界巡迴演唱會」噚晚舉行到佛山站，仍然全場爆棚，阿Sa仲好似Sammi咁，唱到聲都沙埋。之前Twins喺深圳站台上深情嘴對嘴，噚晚歌迷又再要求兩人kiss，不過就俾阿sa拒絕。阿嬌之後就表演佛山無影腳，成功起腳踢得高到可以跨過阿Sa個頭。演唱會中途兩人唱到《相愛六年》時，阿Sa突然感觸落淚，令到傍邊嘅阿嬌都即刻喊起上嚟。

兩人喺後台訪問講到鄭秀文（Sammi）前晚嘅紅館騷，阿Sa阿嬌都話有留意，覺得Sammi病住表演好可憐，希望Sammi早日康復，阿嬌話：「我覺得Sammi太瘦喇，佢應該減肥唔食嘢，身體唔夠抵抗力去打病菌。其實佢日日有運動，唔使節食0架喇，快啲食番肥啲，先有健康0架。」阿Sa就想搵日為Sammi打氣：「Sammi唔好擔心啦，唔使喊，觀眾入得場都係想見到佢之嘛，見到佢就得啦，唱成點都觀眾都唔會介意。」

問到佢哋有冇試過好似Sammi咁病住開騷，阿嬌就話：「阿Sa香港開騷前又病，廣州又病，深圳都病呀。」阿Sa即謂：「係啦，我今年都唔知點解抵抗力咁差，幾次開騷都急性咽喉炎。作為歌手真係冇得揀，病都冇計，都係要上台，個身體又識得上到台就自動死撐埋佢。」