陳奐仁今日到新城電台宣傳新歌《壞人的價值》，佢近日瘦身成功，操得一副好身材，由以前36吋腰褲頭變成現在29吋腰褲頭，佢話最心痛係30幾套西裝唔啱著，要捐出去畀人。

陳奐仁話瘦身之後，同唔少電影公司女高層碰面時，都被摸腹肌，摸完之後就同佢講，下套戲除衫預埋你，陳奐仁笑指：「我係實力派，我諗佢哋個個都嚟check下我腹肌，上鏡有冇嘢睇，睇下貨對唔對辦。」除咗腹肌，胸肌亦係吸引人之處，男男女女都有人埋嚟摸下，太太豈不是最擔心？ 陳奐仁話：「唔會，老婆係摸得我最多。」陳奐仁嘅瘦身目標係內臟脂肪達到8，外觀方面暫冇目標，現時一日保持個半小時做運動。

問到佢咁fit有冇人搵拍內衣褲廣告？佢話：「可以考慮，呢個可以作為我操得更勁嘅目標，到時真係要請教張家輝、張繼聰、彭于晏佢哋，要學識用油曬黑，同埋點樣擺pose最型。」

精選娛聞，喺晒《娛果》
http://fb.com/appledailyent