何雁詩噚日出席觀塘一個音樂活動，着透視look做表演嘉賓，同一個青年舞蹈團合作，不過事前就未夾過，問到之前佢參加比賽有冇試過「蝦碌」嘢，何雁詩直言未試過：「雖然我係音樂比賽出身，但係喺台上有人支持係最重要。」

講到嚟緊陸續有頒獎禮，何雁詩大懵：「我成日以為係一月中，自己未搵到衫，如果搵唔到都着番呢件，優秀選當晚都唔會太性感，我只會去TVB嗰個，其他都唔會參與。」問佢點解會咁，何雁詩就話：「唔知呀!公司冇檔期。」

今年TVB嗰個頒獎禮，男女歌手合拼，何雁詩有啲愕然：「吓!我唔知噃!我係唔係有啲機會呀!?」問到佢睇唔睇好男友鄭俊弘，何雁詩坦言：「撐佢就一定，不過我冇投票，因為佢已經好多fans。」

何雁詩又話前日聖誕節都係同男友度過，約埋啲朋友，由鄭俊弘自下廚，何雁詩笑言：「佢煮雞，佢好緊張，之前有上網睇吓點煮，反而我喺呢方面就麻麻哋，如果之後大家見我肥咗，就唔好怪我。」

更多娛聞，喺晒《娛果》
http://fb.com/appledailyent