中東地區畀《經濟學人》評為世界經濟成長新引擎之一，市場潛力大，連我哋嘅行政長官曾蔭權，都就嚟帶團去考察同推廣。最近高調「勸喻」政府派糖要小心嘅恒隆地產（101）主席陳啓宗，原來喺開拓生意呢方面，同政府都幾啱key，佢噚日出席太平洋理事會經濟論壇時話，最近三個月忙住去中東考察，又有中東投資者同佢傾合作，諗住投資大陸房地產，佢仲話，亞洲同中東日後會有更緊密嘅合作關係。
陳啓宗仲話，內地房地產市場仍然擴張中，香港地產商返內地發展先係出路，不過，原來佢唔多睇好今年國內樓市，仲認為樓價會跌㖭，如果今時今日先去投資，就「祝你好運」。

家陣北上祝君好運

佢舉例舊年第四季上海有幅地，雖然面積只約3.7公頃，但成交地價等如恒隆過去15年投資國內土地嘅總和，簡直瘋狂。點解好似有啲矛盾咁嘅？定係寓意大財團玩長線就得，小投資者短炒免問咁呢？
另外，對於近日炒得好熱嘅美國經濟衰退話題，陳啓宗話機會率唔高，因為過往隔幾年美國就會出現一次金融危機，而且美國有健全嘅經濟基礎，唔使驚噃。