近日為了解決歐債問題，全球不停召開會議，好像剛過去的G20峯會，便討論了成員國透過國際貨幣基金組織（IMF）向歐洲施予援手的可能性，不過，這個由歐洲提出的構思，已遭其他成員國否決。
結果一點也不出奇，無理由歐洲人搞出來的禍，要由其他人幫手承擔。
其實要拯救歐債危機的方法最好就係像當年美國TARP般，向受影響銀行購入歐豬債，由歐央行負責包底。點解咁講？因為歐洲諸國各有盤算，不停談判唔係辦法，即使像上次歐盟峯會已傾好部份框架，希臘都可以忽然玩嘢，難保將來其他歐豬有事時唔會有樣學樣，破壞遊戲規則。

無貨用認購期權博

既然係咁，不如直接由歐央行攬上身，然後制訂將來對財政管理不善的歐元成員國的懲罰機制，總好過讓這班好食懶飛、洗腳唔抹腳的歐豬繼續任意妄為。
外圍情況雖然日日新鮮，不過，筆者對大市反彈未完的睇法並未改變，原因其實好簡單，因為坊間現時的心態仍是較為謹慎，雖然多咗人問買咩貨好，但亦有不少人問是否應趁機清貨，熊市反彈的特徵是要令大部份人解除戒心，令本身尚存恐懼的人也轉為貪婪，觀乎市場氣氛，以上現象仍未算太明顯。
不過，先前沒有在低位買貨的投資者，現時已不宜過份進取，參考08年熊彈的經驗，大市由低位回升約30%，若以今次低位16139點計，位置會落在20900至21000點之間，現時水位已非太多，如果要博，可考慮買入認購期權，勝在輸晒都唔會上身。
況且，熊彈賺價只是頭盤，熊彈後全身而退甚至沽空才是主菜，因此即使唔博實際上都無損失。
張士佳
寶來證券（香港）資產管理部董事
本欄逢周一、三、五刊出