當年今日
關於我們

隔牆有耳︰環保觸覺出書 - 李八方

蘋果日報 2009/12/22 00:00


靠講屏風樓、發水樓響朵嘅環保團體環保觸覺,唔經唔覺已經五歲生日。為咗幫大家溫故知新,環保觸覺最近出咗本新書《圍港──從屏風樓看香港的城市規劃》,明日開售。本書集合晒佢哋過去踢爆過嘅屏風樓、發水樓個案,又解釋發展商如何利用建築面積、實用面積、印刷精美嘅售樓書取巧,八方覺得當作另類置業天書看看都未嘗不可。
本書另一賣點,係訪問咗起埋唔少發水樓嘅恒基地產,睇吓佢哋點樣解畫。發展商代表解畫,兩個字講晒:廢話。環保觸覺主席譚凱邦話,呢本書係佢哋處女作,用咗兩年時間做訪問、搜集資料同排版設計,真正係嘔心瀝血。