歌手王嘉儀(Sophy)今日去到商台宣傳新碟《Quarter》，比喻25歲嘅佢已經過咗四份一半嘅人生，Sophy仲話好感恩呢兩年可以出到碟，所以今日聖誕節都要努力做宣傳，仲話明年會繼續努力，希望可以開騷，佢話：「希望可以同自己欣賞嘅前輩合作，謝安琪同林憶蓮係我偶像，但佢哋對我嚟講太遠嘞，我都好鍾意盧凱彤，佢好型好獨特。」

而Sophy之前喺十大中文金曲頒獎禮攞咗最有前途新人獎，佢話已經將個獎送咗畀媽咪：「屋企人都好支持我，雖然佢哋都會擔心呢行搵唔到食，係正常嘅，今次有少少成績，佢哋都好驕傲同開心，嚟緊嘅頒獎禮平常心。」

另外，Sophy上星期大懵喺港鐵唔見咗銀包，佢話：「係一個黑色嘅銀包，裏面冇錢，但就有信用咭同身份証，o依家已經cut晒，想呼籲有人執到就畀返我。」

更多娛聞，喺晒《娛果》
http://fb.com/appledailyent