41歲肥師奶變索女
陳秀雯減16磅重演《芝加哥》

蘋果日報 2003/04/11 00:00


媽咪級人馬李美鳳現時為瑪花纖體代言人,但皇室纖形近期亦邀得現年四十一歲的陳秀雯拍攝纖體廣告,而她經過三周半的減肥,終成功減掉十六磅,由「肥師奶」變身為電影《芝加哥》中的索女郎,對撼電眼美人。
現年三十九歲的電眼美人李美鳳雖身為人母,但去年她為瑪花纖體擔任代言人後,身形愈來愈弗,近期更穿上泳裝拍攝廣告,而皇室纖形亦不示弱,秘密邀得當年在《再見亦是老婆》一劇中飾肥師奶的陳秀雯(Amy)迎戰,早前Amy便在柴灣一間影樓內,拍攝平面廣告。

減肥後自信大增
四十一歲的Amy在拍廣告前,經過三個半星期的減肥,終成功減去十六磅肥肉,全身減掉三十二吋,體重下跌至一百零四磅,由於Amy在減肥後自信大增,故她便提議以西片《芝加哥》中女角嘉芙蓮薛達鍾絲的造型示人,而廣告商亦覺得建議不錯,故Amy便戴上齊蔭短假髮,穿上銀色露背短裙,以一個全新突破形象拍攝廣告。
Amy昨日在電話中說:「其實我冇諗過會拍纖體廣告,之前我都推咗十間八間纖體公司,我身形一向圓圓哋,信命啦,天生都冇法,但我見到劉嘉玲好弗,韓君婷又真係減咗好多,所以我就諗,自己係咪都減到呢,咁啱皇室搵我,佢哋亦都保證我可以減到,結果我就接咗。」

丈夫親友過晒關
陳秀雯續說:「我對自己嘅形象有一定嘅要求,我早排睇咗《芝加哥》部戲,自己好鍾意,就主動提出試吓片中嘅造型,我覺得今次係突破,以前我着泳衣係一件頭,𠵱家敢着兩件頭,但唔會喺香港着。」問到其丈夫林國雄對她的突破會否接受?Amy笑說:「佢睇過啲相啦,佢冇我咁震驚,我全部親友睇過呢輯相都過晒關。」
採訪:朱芷瑩
empty
陳秀雯(圖)減肥成功,以嘉芙蓮薛達鍾絲之索女造型示人,非常突破。