《城市論壇》9月5日開鑼，謝志峰話自由黨、工聯會都應承再出席，惟獨民建聯耍手，同佢講：「唉！次次都俾人揼，好冇癮o架大佬。」謝志峰話已加強保安，禁止現場觀眾「圍人」同增設圍欄，保證嘉賓全身而退。佢苦口婆心咁講，明年係選舉年，民建聯冇理由將呢個發言空間拱手讓人，「好似劉夢熊咁，有乜場面未見過？一時嚇親可以理解，過咗咁耐，佢哋遲早諗得通」。
做咗七年主持，謝志峰形同《城市論壇》icon，不過佢話節目有30年歷史，經典場面好多，有排未數到佢；好似89年六四後，譚耀宗在維園公開譴責北京血腥鎮壓，到去年呂智偉對住鏡頭指香港人上京派錢，令八九民運「變質」，反映歷史嘅荒謬，而謝志峰嬲到當場反駁呂智偉，佢話係自己做直播節目以來最激一幕。
《城市論壇》係官台節目，偏偏好多高官唔願到，謝志峰冇開名邊個高官A字膊，只係透露有人咁講：「畀我講得幾分鐘，搞我成朝早。你估淨係得我一個嚟？仲有成班人喺我後面度橋。」亦有官員好爽快，就係已退休嘅余志穩，林公公同林鄭都好賞面，尤其係林鄭，去皇后碼頭開壇都冇有怕。